അസ്തമിക്കുന്ന വസ്ത്ര വേര്‍തിരിവുകള്‍

പഴയ ആല്‍ബങ്ങളോ ഫോട്ടോകളോ ഒന്നു ശ്രദ്ധിച്ചു നോക്കൂ. ചിലപ്പോഴെങ്കിലും നിങ്ങളുടെ മുത്തച്ഛനും മുത്തശ്ശിയും ചേര്‍ന്നു നില്‍ക്കുന്ന ഒരു ഫോട്ടോ കാണാന്‍ സാധിക്കും. അവരുടെ വസ്ത്രങ്ങള്‍ എപ്പോഴെങ്കിലും ശ്രദ്ധിച്ചിട്ടുണ്ടോ? ഓള്‍ഡ്മാന്‍ അന്നൊക്കെ സ്റ്റുഡിയോകളില്‍ ലഭ്യമായ കോട്ടു ധരിച്ച് ഇല്ലാത്ത ഗൌരവം നടിച്ചു നില്‍ക്കുകയായിരിക്കും. ലേഡി കാഞ്ചീപുരത്തിലോ നേര്യതിലോ പൊതിഞ്ഞ് ഫോട്ടോയില്‍ എന്നെ കാണാനെങ്ങനെയിരിക്കും എന്ന സ്ത്രീസഹജമായ ആകാംക്ഷയോടെ ക്യാമറയെ ഉറ്റു നോക്കുകയായിരിക്കും. വസ്ത്രത്തിലെ സ്ത്രീപുരുഷ വേര്‍തിരിവ് വ്യക്താണ്. അടുത്ത തലമുറയുടെ ഫോട്ടോയില്‍ പുരുഷന്‍ ഷര്‍ട്ടും പാന്‍റും കായ്യില്‍ വാച്ചും ഒരു പക്ഷെ എരിയുന്ന സിഗരറ്റും റെയ്ബാന്‍ കൂളിങ്ഗ്ലാസ്സും ധരിക്കുന്നു. സ്ത്രീ വലിയ വാവട്ടമുള്ള കമ്മലും കൈകയറ്റിവെട്ടിയ ബ്ലൌസും ധരിച്ചിരിക്കും. അല്ലെങ്കില്‍ കൈ തന്നെ അപ്രത്യക്ഷമായിരിക്കും. ഒരു പക്ഷെ പുരുഷന്‍റെ കോട്ടിനു ഒരു ടൈ സ്ഥാനം പിടിച്ചിരിക്കും. എന്നാലും പുരുഷ വസ്ത്ര ശൈലിയും സ്ത്രീ വസ്ത്രശൈലിയും വ്യതിരിക്തമാണ്. ഇനി നിങ്ങളുടെ സ്കൂള്‍ കോളേജ് ഫോട്ടോകളിലേക്കൊന്നു നോക്കൂ. ചെറിയ ഒരു ശതമാനം ആളുകള്‍ പരമ്പരാഗതമല്ലാത്ത വസ്ത്രങ്ങള്‍ അണിഞ്ഞിരിക്കും. നിങ്ങളും ഒരു പക്ഷെ അവരിലൊരാളായിരിക്കും..

ഇനി നിങ്ങള്‍ പുറത്തു പോകുമ്പോള്‍ ചുറ്റും കണ്ണോടിക്കൂ. കുറഞ്ഞത് ഇരുചക്ര വാഹനയാത്രക്കാരെയെങ്കിലും. പിന്‍ഭാഗദൃശ്യത്തില്‍ നിന്നും ആണോ പെണ്ണോയെന്നു തിരിച്ചറിയാന്‍ സാധിക്കാത്ത വിധം വസ്ത്രരീതി മാറി മറിഞ്ഞിരിക്കുന്നു. ഒരു പക്ഷെ നമ്മള്‍ ലിംഗവ്യത്യാസമില്ലാത്ത വസ്ത്രങ്ങളിലേക്കുള്ള പരിവര്‍ത്തനത്തിന്‍റെ പാതിയിലായിരിക്കാം. പ്രകടമായി എന്നാല്‍ ആശ്ചര്യകരമായി ഈ വിപ്ലവം ആദ്യം സംഭവിക്കുന്നത് അടിവസ്ത്രങ്ങളിലാണ്. സാധാരണയായി പുരുഷന്‍മാര്‍ നെടുകെയും കുറുകെയും സ്റ്റിച്ചുകളുള്ള വലിയ ഇലാസ്റ്റിക്കുകളുള്ള ബ്രീഫുകളും സ്ത്രീകള്‍ പരുത്തിയുടെ സുഖസൌകര്യം പകരുന്ന പാന്‍റികളും ധരിച്ചുപോന്നു. ബ്രീഫിനെ ഒരു കൊടുങ്കാറ്റിലെന്ന പോലെ കണ്ണടച്ചു തുറക്കുന്ന വേഗത്തില്‍ ഫ്രെഞ്ചിയെന്ന അപരനാമത്തില്‍ പ്രത്യക്ഷപ്പെട്ട നപുംസക അടിവസ്ത്രം അപ്രസക്തമാക്കി. ശ്രദ്ധിക്കാതെ പോയ ഒന്നുണ്ട്. ഈ സാഹചര്യത്തില്‍ പുരുഷന്‍ സ്ത്രീയുടെ പരമ്പരാഗത അടിവസ്ത്രത്തിലേക്ക് മാറുകയെന്ന വൈപരീത്യമാണ് സംഭവിച്ചത്. ഇതിന്‍റെ പ്രസക്തമായ കാരണം അടിവസ്ത്രം അപൂര്‍വ്വം സാഹചര്യത്തിലല്ലാതെ പൊതുപ്രദര്‍ശനത്തിനു വെക്കാറില്ലെന്നതായിരിക്കും. ശരിക്കും നിശബ്ദമായ വിപ്ലവം, ലിംഗേതര വസ്ത്രധാരണത്തിലേക്കുള്ള പരിവര്‍ത്തനത്തിന്‍റെ ആദ്യ ഘട്ടം ഇങ്ങനെ സംഭവിച്ചു.

കേബിള്‍ ടിവിയും ചാനലുകളും രംഗപ്രവേശം ചെയ്തതോടെ പരമ്പരാഗത സ്ത്രീപുരുഷ വസ്ത്രധാരണരീതിയിലുള്ള വ്യത്യാസം ന്യായീകരിക്കപ്പെട്ടു. കൊച്ചു സ്ക്രീനിലെ ലിംഗേതര വസ്ത്രധാരണത്തിന്‍റെ തുടര്‍ച്ചയായ പ്രദര്‍ശനം ഇതിനു ഹേതുവായി. നിരന്തരമായി ആവര്‍ത്തിക്കപ്പെടുന്ന ഏതു നുണയും സത്യമാകുന്നതു പോലെ മനുഷ്യസഹജമായ കാരണങ്ങള്‍ കൊണ്ട് ഈ വസ്ത്രവ്യതിയാനം എതിര്‍പ്പുകളില്ലാതെ സ്വീകരിക്കപ്പെട്ടു. ചാനലുകളുടെ രംഗപ്രവേശത്തിനു ശേഷം സമൂഹമനസ്സ് വസ്ത്രവ്യതിയാനങ്ങളുടെ തരംഗദൈര്‍ഘ്യം സ്വായത്തമാക്കാന്‍ പരുവപ്പെട്ടു. മുന്‍പൊക്കെ ആധുനിക വേഷവിതാനം വളരെ അപൂര്‍വ്വവും സമൂഹത്തിലെ ചില വിഭാഗങ്ങളില്‍ മാത്രം പരിമിതവുമായിരുന്നു. പൊതു സ്ഥലങ്ങളില്‍ അത്തരം പ്രദര്‍ശനങ്ങള്‍ ശ്രദ്ധാകേന്ദ്രമാകുകയും ചെയ്തു. ചാനലുകളും പരസ്യങ്ങളും നമ്മെ നിരന്തരമായി പ്രബോദിപ്പിച്ചതിനു ശേഷം അല്ലെങ്കില്‍ വസ്ത്രവിപ്ലവങ്ങള്‍ സ്വീകരിക്കാന്‍ പ്രാപ്തമാകുന്ന വിധം നമ്മളെ മെരുക്കിയതിനു ശേഷം വിപണിയിലെ പുതിയ വസ്ത്ര വസന്തങ്ങള്‍ക്കു സാക്ഷിയായി ഗാലറിയില്‍ സ്ഥാനം പിടിച്ചു.

ഇന്ന് ലിംഗേതര വസ്ത്രങ്ങള്‍ നമ്മുടെ ദൈനംദിന ജീവിതത്തിന്‍റെ ഭാഗമായിക്കഴിഞ്ഞു. സ്ത്രീപുരുഷ വ്യത്യാസം പരമ്പരാഗത വസ്ത്രങ്ങളില്‍ മാത്രമായി പരിമിതപ്പെടുന്നു. പുരുഷന്‍ സാരി ധരിക്കുന്നത് തീര്‍ത്തും അസാധ്യവും സ്ത്രീ മുണ്ട് ധരിക്കുന്നത് കുറച്ച് സ്വീകാര്യവുമാകുമ്പോള്‍ തന്നെ മറ്റു വസ്ത്രങ്ങളിലേക്ക് വരുമ്പോള്‍ സ്ത്രീപുരുഷന്മാരുടെ പരമ്പരാഗത വസ്ത്രരീതികള്‍ വേര്‍തിരിച്ചറിയുന്നത് ദുഷ്കരമായിക്കൊണ്ടിരിക്കുന്നു

ആധുനിക സ്ത്രീകള്‍ സാരിയേയും മറ്റു പരമ്പരാഗതവസ്ത്രങ്ങളെയും എതിര്‍ക്കുന്നതിനുള്ള കാരണം മാറ്റമില്ലാതെ തുടരുന്നുവെന്നത് പ്രസക്തമാണ്. സാരി സ്ത്രീ ശരീരത്തെ വളരെയധികം വെളിപ്പെടുത്തുന്നു അല്ലെങ്കില്‍ പൂര്‍ണ്ണമായി മറയ്ക്കുന്നില്ലെന്നതാണ് ആരോപണങ്ങളില്‍ പ്രധാനം. ആധുനികമെന്നു വിവക്ഷിക്കപ്പെടുന്ന വസ്ത്രങ്ങള്‍ കുറച്ച് വിശദമായി നിരീക്ഷിക്കൂ. വസ്ത്രം ശരീരത്തെ മൂടുന്നു എന്ന ന്യായത്തില്‍ അത് പൂര്‍ണ്ണമായും ശരീരത്തെ മറയ്ക്കുന്നു. അതേ സമയം തന്നെ ആ വസ്ത്രങ്ങള്‍ ഏതു പരമ്പരാഗത വസ്ത്രം വെളിപ്പെടുത്തിന്നതിനേക്കാളധികം സ്ത്രീശരീരം വെളിപ്പെടുത്തുകയും ചെയ്യുന്നു. ഇന്ന് സ്ത്രീകള്‍ ധരിക്കുന്ന മിക്കവാറും എല്ലാ വസ്ത്രങ്ങളും ചുരീദാറൊഴികെ ശരീരത്തിന്‍റെ വളവു തിരിവുകളും ഭൂമിശാസ്ത്രവും വെളിപ്പെടുത്തുകയും സങ്കല്‍പ്പിക്കാന്‍ ഒന്നും അവശേഷിപ്പിക്കാതിരിക്കുയും ചെയ്യുന്നു. സായിപ്പിന്‍റെ ഭാഷയില്‍ പാന്‍റി ലൈന്‍ അല്ലെങ്കില്‍ നിതംബവടിവുകള്‍ പോലും വ്യക്തമാണ്.

ഒരു മുതിര്‍ന്ന സ്ത്രീപ്രജയോടും സംശയം പ്രകടിപ്പിച്ചപ്പോള്‍ കിട്ടിയ ഉത്തരം ഇതാണ്. വാമൊഴിയുടെ നൈസര്‍ഗ്ഗിക സ്വഭാവം നഷ്ടപ്പെടുത്താതിരിക്കാനായി ഇംഗ്ലീഷില്‍ തന്നെ ഉദ്ധരിക്കുന്നു. “when it was sari, it’s the real stuff for dressing, because if you want to wear it neatly, that is a very decent dress, or if you want to make it vulgar, just make the waist line little bit lower. If you want to provoke somebody you just bend down casually or raise your hands up. But even then there will be something left for imagination. But with this modern outfits, there is not that much to hide, then how comes something to reveal? They cover everything in full but show everything in detail and there is no need of any such imagination.”

ആ ലേഡിയോട് യോജിക്കുമ്പോള്‍ തന്നെ വിയോജിക്കാതിരിക്കാനും സാധിച്ചില്ല. കാരണം വസ്ത്രധാരണം മാനസിക സംസ്കാരത്തിന്‍റെ വിളംബരമാണ്. പക്ഷെ ആ സംഭാഷണം കുറച്ചു ചിന്തകള്‍ക്കു കാരണമായി. ഒരു പക്ഷെ ശരീരം പുറത്തു കാണിക്കുന്നതും അല്ലാത്തതുമായ എല്ലാ തരത്തിലുമുള്ള വസ്ത്രങ്ങളോടുള്ള സാമൂഹിക സഹിഷ്ണതയുടെ ബാരോമീറ്ററിലെ രസനിരപ്പ് ഉയരുകയായിരിക്കാം. ഏതു തരം വസ്ത്രത്തെയും വെറും വസ്ത്രധാരണരീതി മാത്രമായി കാണാനുള്ള ഒരു മാനസിക സംസ്കാരം നാം നേടിയെടുത്തിരിക്കാം. വസ്ത്രധാരണത്തെ ലൈംഗിക പ്രസ്താവനയായി കാണുന്ന രീതി മാറിയിരിക്കാം. കുറച്ചു വര്‍ഷങ്ങള്‍ക്കു മുന്‍പ് ശരീരം വെളിപ്പെടുത്തുന്ന വസ്ത്രങ്ങളെല്ലാം തന്നെ ലൈംഗിക പ്രസ്താവനയായോ ലൈംഗിക ക്ഷണമായോ കണക്കാക്കപ്പെട്ടിരുന്നു. പക്ഷെ ഇന്ന് വസ്ത്രങ്ങള്‍ക്ക് സാമൂഹിത തലത്തില്‍ ലൈംഗികപ്രസ്താവനകളുമായി ബന്ധമൊന്നും കല്‍പ്പിക്കപ്പെടുന്നില്ല. ക്ലിയോപാട്രയുടെ കാലത്ത് ലിപ്സ്റ്റിക് ഒരു പ്രത്യേ ലൈംഗികമുന്‍ഗണനയുടെ അല്ലെങ്കില്‍ ലൈംഗികശീലത്തിന്‍റെ വിളംബരമായി കണക്കാക്കിയിരുന്നു. കാലം ചെന്നപ്പോള്‍ സൌന്ദര്യപരമായ കാരണങ്ങള്‍ കൊണ്ടും കാലാവസ്ഥാപരമായ കാരണങ്ങള്‍ കൊണ്ടും ലിപ്സ്റ്റിക് സ്ത്രീയുടെ മേക്കപ്പിന്‍റെ പ്രധാനഭാഗമായി മാറി. ലിപ്സ്റ്റിക്കിനോടുള്ള മനോഭാവത്തിലെ മാറ്റം നൂറ്റാണ്ടുകള്‍ കൊണ്ടാണ് സംഭവിച്ചത്. പക്ഷെ കുറച്ചു വര്‍ഷങ്ങള്‍ കൊണ്ടു തന്നെ ശരീരം വെളിപ്പെടുത്തുന്ന വസ്ത്രങ്ങള്‍ ലൈംഗികപ്രസ്താവന എന്നതിലുപരിയായി ജീവിതശൈലിയായി സ്വീകരിക്കുന്നതിനുള്ള സാമൂഹിക മാനസിക പക്വത നാം ആര്‍ജ്ജിച്ചിരിക്കുന്നു. നൂറ്റാണ്ടുകളുടെ മാറ്റം വര്‍ഷങ്ങള്‍ കൊണ്ട് സംഭവിച്ചിരിക്കുന്നു

അസ്തമിക്കുന്ന വസ്ത്ര വേര്‍തിരിവുകള്‍